انا لامؤاخذة حرقت القسم
دول كفرونا، انتي ماتعرفيش كانوا بيعملو فينا ايه قبل الثورة. كان في كمين، يشاورلي كده على الرخص و يقولي اركن على جنب. الضابط لازم اجيبله سجاير و اللي هو عايزه. و يبعتني اجيبله عشاء، ده غير الشتيمة اللي ماقدرش اقولها لحضرتك. بس الفلوس معايا مكانتش بتكمل فقلتلوا يا باشا ينفع اجيبلك عشاء على قدنا، قاللي يعني ايه؟ قلتله جبنة رومي و حاجات كده، قاللي الجبنة الرومي ديه تجيبها لأمك، لمراتك في بيتك، مش هنا.
مرة قلتله اضربني بالنار خلاص مش هاجيب حاجة. راح واخدني القسم و كان هيلفقلي تهمة سلاح و يقول انه لقى مخدرات معايا في شنطة العربية. انا الصراحة عييط المرة دي. مين هيصرف على ولادي و مراتي، اترجيته لغاية ما سابني. من ساعتها و أنا مابروحش الناحية ديه، حتى لو حد إداني ألف جنية.
لما قامت الثورة انا لامؤاخذاة حرقت القسم. خلاص ماكنتش قادر.
و كان فيه امين شرطة جارنا، كنا نقعد بالليل نلفنا سيجارة وهو كان عارف احنا بنعمل ايه، كان ييجي في الأخر ياخد من كل واحد مننا خمسين جنية. روحنا منزلينه ملط لامؤاخذه. و مراته عمالة تصوت سيبوه سيبوه.
**
ديه حكاية من حكايات ناس كثيرة حرقوا الأقسام. ده كان قسم روض الفرج، و كل مكان كان ليه قصة مختلفة، كل واحد مات ليه قصة ومنهم ناس ماتت لأن بيوتها كانت قريبة. بس ده مش مهم، المهم ان ساعة ما كان في ألاف بيهتفوا في الميادين العامة كان في غيرهم نزلوا يجيبوا حقهم أو ينتقموا لظلم سنين بالطريقة الوحيدة اللي جت في بالهم ومن خلال الهجوم على الجهة الظالمة او ممثلة الظلم.
ممكن نقعد على فيس بوكنا و توتيترنا وكل واحد يعمل فيها خبير استراتيجي على قهوة او تليفزيون ونناقش اذا كانوا بلطجية و لا لأ أو يستحقوا يموتوا و لا لأ. لكن ديه رفاهية حتى احنا مش هنقدر عليها قريب، لأن ببساطة احنا بنحاول نتجاهل ان كان فيه ثورة أو انتفاضة شعبية بدون قائد أو هدف محدد، دافعها الوحيد هو أخذ حقها والإنتقام لأفعال تمت على مدار سنين او خلال يوم 28 يناير. ديه ثورة قامت في مناطق كثير، بعيد عن الكاميرات و بعيد عن الهتاف السياسي في حالات كتيرة، قامت كرد فعل لممارسات البوليس وبالتزامن مع حركة اكثر تنظيماً في أهدافها، و هي المطالبة بالعدالة و الحرية و الكرامة و التغيير بالتظاهر يوم عيد الشرطة، قامت بالتزامن مع مظاهرات هدفها اختصام الشرطة. (ايوه، شباب 25 الطاهر كان بالأساس ضد الشرطة، أو الجهاز القمعي للنظام، اومال اختار عيدها ليه كأول يوم تظاهر؟)
مع استمرار الحال كما هو عليه هيفضل احتمال تكرار يوم 28 قائم، ممكن السنة دي و ممكن بعد عشرة، و هتفضل زي ماهيه، حركة قائمة بذاتها، لايمكن لشخص تفعيلها أو انهائها.
و ده لا علاقة له بحب الناس و كرهها للثورة، فكرة حرق القسم في القصة ديه مثلاً كانت نتيجة تحليل بسيط غير مسيس، هو ضربني فهضربه، مش ههتف ضده. يعني عادي جدا ممكن تلاقي واحد بيشتم في العيال بتوع التحرير والمظاهرات الفئوية و يعتبر المطالب السياسية رفاهية لا يقدر عليها و مش فارقة معاه تسليم السلطة ولا دستور ولا انتخابات، بس يروح يهجم على قسم علشان الضابط اللي جوه قتله حد.
ولو عايزين اقولهلكم بطريقة الخبير الإستراتيجي: في حالة حدوث فعل لأسباب معينة، سيتكرر الحدث ما لم تنتفي اسباب وقوعه.
that was short, direct and clear.
and most importantly true and moving.
not everyone is politician, not everyone cares about constitution.
but they care about justice and dignity above all.
thanks for writing it, wish other will read it someday and hopefully understanding it.
مش كل رجال الشرطة فاسدين، كما ان السواقين مش ملايكه! قدام القصة دي مئات القصص عن فجور السائقين والحرامية والمسجلين واللي كانوا بيرهبوا الشرطة والشعب قبل الثورة وبعض الظباط كانوا شايفين دي الطريقة الوحيده للتعامل معاهم!! وعلى فكره دول فعلاً شاركوا في حرق الأقسام وقتل الظباط…
أفتكري قصة عماد الكبير واللي عمله في ناهيا بعد ما خرج من القسم!
أعتقد المره الجاية اللي هيقرب من القسم هينضرب بالنار من غير مناقشة ؛ المهم ان محدش يعيط بعد كده ويقول شهداء
well said!
أنا قابلت واحد قاللي إنه برضه هجم على قسم شرطة لأنه اتذل كتير ومرة اتاخد عشان كان واقف مع .
واحدة ع الكورنيش وعملوا عليه حفلة تعذيب
لازم مننساش إن ثقافة التظاهر مش موجودة عند كل الفئات في المجتمع وفي مناطق في البلد مفيهاش ثقافة الاحتجاج أصلا
لكن للأسف هنلاقي ناس بتبرر التعذيب زي التعليق اللي قبلي مع إن انتشار التعذيب كان هو الشرارة الحقيقية للثورة
أثناء أحداث شارع محمد محمود الماضية تعبت جداَ من الغاز لدرجة مكنتش قادر أقف خدوني صحابي وروحوني على بلدنا “بلبيس بالشرقية” تاني يوم نزلت احلق شعري واجهز نفسي عشان اروح تاني
المهم وانا عند الحلاق دخل واحد لافف راسه بكوفيه فصابر الحلاق بيقوله كنت فين
قاله كنت في المتظاهرات .. قاله طب ايه اللي وداك هناك وسط العيال دي
قام ابو كوفيه قاله “اهو لو كسروا القسم ينوبني من الحب جانب بحتة سلاح ولا اضرب ظابط”
هي دي العينة من ناس معدومة وسط مجتمعنا .. ما يفهمش غيرانه عايز يستغل الفرصة انه ياخد سلاح او يضرب ظابط
وهوه ده مجرد نوع من انواع بلطجية كتير رباها النظام
استاذ عزب،
بكلامك عن (الطريقة ديه) هل قصدك تلفيق التهم و لا استخدام السلطة لمصالح شخصية كبيرة او صغيرة و لا تعذيب؟ يعنى الجهاز اللي يعامل المواطنين و المجرمين بالطريقة ديه هل بيحمى المجتمع و لا بيخلق دائرة مفرغة من الإجرام و مصنع لخلق مجرمين؟ انا مش بتكلم عن حقوق المواطن في المعاملة القانونية و لكن عن حقوق المجتمع ككل في تحقيق امن مستدام و حقيقي و فكرة الأستدامة في الأمن لا تتحقق بغياب العدالة. انا مفروض احاسب الشرطي اللي بيخلقلي مجرم جديد او بيزيد من اجرام واحد بسبب (الطريقة) ديه قبل ما احاسبه على انتهاك حقوق فرد.
تاني حاجة هو اصلا في يناير تم اطلاق النار على الناس من غير نقاش يعني مافيش حاجة اتغيرت، و كان الضرب بهدف القتل و ساعات بطريقة عشوائية على كل من تواجد في المحيط الأكبر للأقسام، يعنى المناطق السكنية، و كان سبب محاولة اقتحام الأقسام و حرقها في اماكن كثيرة هو اطلاق النار على المتظاهرين خلال اليوم من فوق الأقسام. و لكن رغم كده في مناطق كثيرة الناس في الأخر طلعت الضباط و العساكر اللي جوه علشان مايتحرقوش مع المبنى.
اللي انا حاولت اوضحه انا استمرار ممارسات قمعية هيؤدي لنفس النتيجة اللي حصلت في يناير من غير ما يكون لأي حد سيطرة عليه، و ده هيكون في رأي شرارة لحركة فوضوية عنيفة لازم تجنبها، و الحل الوحيد لتجنبها هو ازالة الأسباب و تحقيق العدالة اللي السلطة لغاية دلوقتي بتكابر في تنفيذ ابسط مبادئها.